ليلة الجمعة اللي فاتت صدفة سمعت أختي - أم 15 سنة - بتتكلم مع واحدة صاحبتها كانت بتذاكر معاها و طبعاً الموضوع كان عن الإستفتاء البنت من عائلة مسلمة معتدلة راقية نوعاً ما والدها طبيب و والدتها مدرسة , بعكس ما كنت متوقع تماماً البنت كانت بتحكي مع أختي عن إن نعم دي بتاعة المسلمين و لأ بتاعة المسيحيين و "قال إيه عايزين يلغوا المادة التانية .. ده بعدهم" و الذي منه .
ممكن تتصور من طفلة - أم 15 سنة - إنها متكنش سمعت عن الدستور أو إن أهلها اللي المفروض من أرقى طبقات المجتمع مهتموش بالنقطة دي خالص في تنشئتها بل و أعتقد إنهم ذات نفسهم معنهدمش معلومات كافية في الموضوع ده .
في نفس اليوم في صلاة الجمعة - اللي والدي بيجبرني أصليها - الشيخ نفض خالص لموضوع الإستفتاء - و كأنه عارف النتيجة سلفاً - و إتكلم عن حرمانية التعامل مع النصارى من الأساس و واجبنا الشرعي إننا منبدأهمش بالسلام و نضطرهم لأضيق الطرق و نغلس عليهم كمان إن أمكن و خد ييجي ساعتين - و هو طول خطبته في المتوسط - يعدد الأيات و الأحاديث اللي بتدعم موقفه زي مثلاً إن اللي عندنا دول مش أهل كتاب دول كفرة و العياذ بالله مش ربًنا بيقول عليهم " قد كفر " يبقوا قد كفر و مينفعش نتعامل معاهم .
ممكن تتصور إن طفلة عندها 15 سنة أو راجل عازل نفسه بين كتب إتكتبت من قرون أكتر من رقم الIQ بتاع حضرته ميعرفوش حاجة عن التعديلات الدستورية و الموضوع بالنسبالهم خالفوا اليهود و النصارى لكن الغريبة إن زمايلي في كلية صيدلة - اللي مبروحهاش غالباً - إتوزع عليهم ورق في مضمونه حرمانية التصويت ب"لا" و بعضهم إقتنع جداً و راح صور خمسيناية و وزعها هو راخر .
ممكن تتصور إن الكلام منطقي كفاية إنه يقنع حد علشان كدة إتفضل شوف دي :)
 |
| مش نفس الورقة اللي إتوزعت على زمايلي في الكلية |
مش عاوز أعلق على الورقة دي علشان إنك تشوفها بس كفاية تجيب لحضرتك سكر مش ناقصة تعليقات مستفزة .
يارتنى ما قريت الورقة
ردحذفو مقالك ساخر جيد (: